Chama
cha Demokrasia na Maendeleo (Chadema), kimefungua milango kwa Waziri
Mkuu mstaafu, Frederick Sumaye, katika harakati za kuelekea uchaguzi
mkuu wa mwaka 2015.
Kimesema wanaombeza kwa madai kwamba rushwa anayoipigia kelele iliasisiwa wakati akiwa madarakani, hawalitakii mema taifa.
Kauli
ya kumkaribisha Sumaye kujiunga na Chadema ilitolewa na Mwenyekiti
wake, Freeman Mbowe, juzi muda mfupi baada ya Sumaye kumaliza hotuba
yake wakati wa hafla ya uzinduzi wa Kanisa la Lole la Usharika wa Mwika,
Dayosisi ya Kaskazini ya Kanisa la Kiinjili la Kilutheri Tanzania
(KKKT).
Hatua
ya Mbowe kumkaribisha Sumaye kujiunga na Chadema inafuatia kauli
aliyoitoa Waziri Mkuu huyo mstaafu wiki iliyopita kwamba mahasimu wake
kisiasa ‘wanampakazia’ kwamba yeye ni maskini wa kutupwa, hivyo hana
uwezo wa kuwapa fedha wanaomuunga mkono katika kupinga rushwa ya
uchaguzi, ufisadi na aina nyingine ya uovu kwa jamii ya Watanzania.
“Mheshimiwa
Waziri Mkuu mstaafu (Sumaye), kama nilivyokwisha tangulia kukuomba
radhi, huko ulipo ni pagumu, karibu kwetu kwa sababu sisi tunakemea
rushwa wazi wazi, tena bila ya kificho, tumekemea rushwa siyo leo, siyo
jana. Tuko tayari kufanya kazi na wewe kwa sababu unakemea rushwa,
tunakupongeza na karibu sana,” alisema Mbowe mbele ya viongozi
mbalimbali wa kisiasa na dini akiwamo Mkuu wa Kanisa hilo nchini, Askofu
Dk. Alex Malasusa.
Mbowe
alisema kwamba maneno aliyozungumza Sumaye ameyatafakari kwa kina na
kujiuliza maswali mengi kwa kuwa maneno hayo siyo mepesi sana kuyasikia
hasa kwa viongozi ambao wamekuwa na mamlaka ya kikatiba kuwaongoza
Watanzania.
Alisema
kuwa hoja ya rushwa inayotolewa na Sumaye, ni ya msingi sana na haki
katika taifa la Tanzania ni bidhaa adimu na kwamba wanaotetea haki wengi
wao huipata kwa gharama ya maisha yao.
“Kwa watu ambao tuko katika active politics (siasa hai), tunaona namna siasa zinavyobadilika na kuwa ni mambo ya kutishia uhai wa watu. Wenzetu viongozi wa Kanisa mtusaidie kuomba ili tusije tukajenga misingi ya kulipasua taifa hili kwa itikadi ya vyama vya siasa,” alisema na kuongeza:
“Kwa watu ambao tuko katika active politics (siasa hai), tunaona namna siasa zinavyobadilika na kuwa ni mambo ya kutishia uhai wa watu. Wenzetu viongozi wa Kanisa mtusaidie kuomba ili tusije tukajenga misingi ya kulipasua taifa hili kwa itikadi ya vyama vya siasa,” alisema na kuongeza:
“Haya
ni mambo ya kupita na Mheshimiwa Sumaye siasa ni kazi ya kupita kesho
CCM inaweza isiwapo na Chadema ikawapo…njoo sasa Chadema.”
KAULI YA SUMAYE
Hata hivyo, baada ya ombi la Mbowe, Sumaye hakujibu lolote zaidi ya kutikisa kichwa na kutabasamu.
Sumaye,
alipoulizwa na NIPASHE kwa njia ya simu jana kuhusiana na kauli ya
Mbowe, alisema yeye ni mwana-CCM halisi, hivyo ataendelea kubaki ndani
ya chama hicho daima kama mwanachama mwaminifu.
“Kwenye
vyama vya siasa, hakuna kualikana, ukijisikia na wakati ukifika
unakwenda, Mbowe kazungumza vile kwa kuwa amejisikia kuzungumza mbele ya
hadhara ila sina mpango wa kuhamia Chadema,” alisema Sumaye.
Kuhusu
uwajibikaji wa kibunge, Mbowe alisema wawakilishi wote wa wananchi,
mwezi ujao watakwenda kuanza Bunge la Katiba ambalo litachukua miezi
mitatu na kwamba kuna mambo mengi ambayo yako gizani mbele yao, hivyo
wanaliomba Kanisa lisikae mbali kushiriki nao katika hatua zote za
kiukombozi.
Kwa
nyakati tofauti akiwa katika harambee ya kuchangia ujenzi wa ukumbi wa
mikutano wa Kanisa la Visitation Maonano, Parokia ya Mawela katika Jimbo
Katoliki la Moshi na hafla ya uzinduzi wa Kanisa la Usharika wa
Lole-Mwika wa Dayosisi ya Kaskazini ya KKKT mwishoni mwa wiki, Sumaye
alisema kuwa hivi sasa rushwa na matumizi makubwa ya fedha za kuwanunua
wapigakura, vinataka kuwa utaratibu halali wa kuwapata viongozi kuanzia
ngazi za vijiji hadi urais.
“Ukikemea
rushwa tu basi utapachikwa sababu nyingi zisizohusika ikiwamo ya
kugombea urais mwaka 2015. Nasema katika hili suala la kugombea au
kutogombea urais si sababu. Vita yangu dhidi vya rushwa si ya leo,”
alisema.
CHANZO:
NIPASHE
